中電CEO隨時要「吹波」 嚴禁員工飲酒 不斷抽查

[訪客]

中電CEO隨時要「吹波」 嚴禁員工飲酒 不斷抽查

2009年2月21日


【明報專訊】係咪要加強醉酒駕駛罰則，最近成為城中熱話。小琴噚日同中電朋友傾開，原來中電好嚴格，有專職護士不斷抽查員工 返工時間內有冇飲酒，連中電CEO包立賢 (Andrew Brandler) 都唔例外，專職護士要來查，打個電話就會直搗CEO辦公室，要佢「吹波仔」兼驗尿。

酒精零容忍 嚴過法例

友人話，點解中電咁嚴格，除有員工要駕車外，亦有唔少員工要操作電廠裏面的機組，一旦出錯，後果可以不堪設想。所以十幾年前，就已經嚴格執行隨機抽查，而且標準好高，係零容忍，尺度絕對比法例要求高。依家香港法例規定，司機每100毫升呼氣中，酒精含量不能超過22微克。

除驗酒外，仲要驗有冇食藥，因為擔心員工濫藥同樣會出錯，所以護士姐姐仲會請員工提交尿液樣本。友人話，因為要做到一視同仁，所以除前線員工之外，坐係亞皆老街總部的高層，同樣要被抽驗，一年大大話話都會至少驗一次。

所以中電高層中午時間要應酬，免得過都唔會飲酒。若果真係明知避唔到，就要事先申請豁免。要食藥都要事先申報。友人話，有時都覺得好煩，要去廁所搞埋尿液樣本，不過諗到為工作安全，就點都要合作。

超標做錯 必炒無疑

若果發現因為超標而出錯，Sorry，該名員工必炒無疑。若未致於出錯，亦要參加戒酒戒藥輔導。為新界、九龍區百萬用戶供電穩定，中電咁嚴格都係好應該。